HEBREO 6:17-18 AB 2001
17 Gayundin naman, sa pagnanais ng Diyos na maipakita sa mga tagapagmana ng pangako na hindi maaaring mabago ang kanyang pasiya, pinagtibay niya ito sa pamamagitan ng isang sumpa; 18 upang sa pamamagitan ng dalawang bagay na di-mababago, na dito'y hindi maaaring magsinungaling ang Diyos, tayong nagtungo sa kanlungan ay magkaroon ng higit na katiyakang panghawakan ang pag-asang nakalagay sa harapan natin.
Pangangako at Panunumpa: dalawang mga paraan ng pagtiyak ng tao na totoo at maaasahan ang kanyang mga sinasabi.
◘ “Ipinapangako ko.”
◘ “Isinusumpa ko.”
Ngunit marami sa mga pangako ay napapako. Ngunit marami sa mga sumpa ay napupuksa. Bakit ganun? Iyan ay sapagkat likas sa makasalanang tao ang pagsisinungaling.
▒ Awit 58:3- Ang masama ay naliligaw mula sa bahay-bata,
silang nagsasalita ng mga kasinungalingan ay naliligaw mula sa pagkapanganak.
▒ Awit 12:2- Bawat isa ay nagsasalita ng kabulaanan sa kanyang kapwa
Sa tekstong ating binasa, tayong mga nagsitungo sa Diyos upang manganlong sa kanyang kaligtasan ay nararapat magsipanatag ng loob. Bakit? Sapagkat ang ating inaasahang pagliligtas ng Diyos ay mga salitang hindi nagbabago dahil ito ay ipinangako niya at pinagtibay pa ng isang sumpa. At hindi tulad ng makasalanang tao na nangako nga at nanumpa’y wala pa ring katiyakan kung tunay ngang maaasahan, ang Diyos ay hindi maaaring magsinungaling. Siya ay Diyos ng katotohanan kaya naman ang lahat ng kanyang mga sinambit na mabubuting bagay para sa atin ay kanyang tutupdin isa-isa. Hinding-hindi niya hahayaang madungisan ang kanyang banal na ngalan kaya naman mananatili siyang tapat sa kanyang mga sinasambit.
